Алаяқтық пен қаржы пирамидасын қалай ажыратуға болады, бюджетті жоспарлау не үшін қажет, қор нарығы мен кредиттік тарих дегеніміз не, сондай-ақ өзіңнің қаржылық сауаттылық деңгейіңді арттыру не үшін керек – ҚР Қаржы нарығын реттеу және дамыту агенттігінің (Агенттік) өкілдері Қазақстан қаржыгерлер қауымдастығы, ҚР Қаржылық мониторинг агенттігі (ҚМА), ҚР Бас прокуратурасы, ҚМҚҰҚ, БЖЗҚ, KASE, Бірінші кредиттік бюро, «KMF-Демеу», Алматы қ. Медеу ауданы әкімдігі мен Rahym қоғамдық қорымен бірлесіп, оқушылар мен студенттер үшін осы тақырыптар бойынша қысқаша сабақ өткізді.
Қаржылық сауаттылық апталығы 2022 жылғы 20 сәуірде Алматы қ. «Тұран» университетінің алаңында басталып, онда қаржылық сауаттылық бойынша дөңгелек үстелдер мен олимпиада өтті.
Ағымдағы жылғы 25 сәуірден бастап қаржы реттеушісінің өкілдері кредиттік жауапкершілікті арттыру және алаяқтық пен қаржы пирамидаларына қарсы іс-қимыл тақырыбы бойынша қазақстандық университеттер мен колледждердің студенттерімен кездесулерге қатысты.
«Қазіргі жастардың технологиялық прогрестен қалмай, ИТ-технологияларды жақсы білетіндігіне қарамастан, олар өздерінің аңғалдығы мен абайсыздығы салдарынан алаяқтардың қармағына ілініп жатады және оларды қаржы пирамидаларына тарту оңайға соғады. Балалар мен студенттер қаржы алаяқтарына жиі алданып қалады. Сондықтан, қаржылық сауаттылықты меңгеруді ерте жастан бастау керек!», - деп есептейді Қаржылық қызметтерді тұтынушылардың құқықтарын қорғау департаментінің директоры А. Терентьев.
Ол дәрістер форматындағы оқыту іс-шаралары Қаржылық сауаттылықты арттырудың 2020 – 2024 жылдарға арналған тұжырымдамасы аясында өткізіліп жатқанын және Қазақстанның барлық өңірлерінде тұрақты түрде өтетінін айтты.
Сондай-ақ, А.Терентьев жалпы білім беретін мектептерде алғаш рет 2022 жылғы 29 сәуірден бастап Агенттіктің Қазақстан Республикасы Білім және ғылым министрлігімен және ҚМА-мен бірлесіп ұйымдастырған балалардың киберқауіпсіздігі бойынша тақырыптық сағаттардың өткенін айтты. Алғашқы сабақтар Алматы қаласындағы мемлекеттік және жекеменшік мектептерде 5-11 сынып оқушылары үшін өткізілді. Оқушыларға цифрлық гигиена, Интернеттегі алдаудың негізгі жолдары, қаржы пирамидаларының белгілері туралы айтылды.
Қаржылық сауаттылықты арттыруға арналған іс-шараларға тыңдаушы немесе дәріскер ретінде қатысқыңыз келсе, Агенттікке +7 727 237 1000 нөмірі бойынша Call-орталық арқылы немесе Fingramota Online мобильдік қосымшасы арқылы хабарласуыңызға болады, оны мына сілтемелерден жүктеп алуға болады:
- App Store арқылы
- Play Market арқылы
- Сондай-ақ мобильдік қосымшаның веб-нұсқасы бар.